內地發展商恒大（03333）真係愈撈愈多，繼賣礦泉水同入股內地銀行，絲絲尋日睇外電報道，美國Brigham and Women's Hospital依家考慮緊恒大老闆許家印嘅提議，同恒大喺內地合作發展醫院，有機會成為第一間進軍內地嘅哈佛大學附屬醫院，非常架勢！
絲絲問過接近恒大消息嘅老友，佢就話暫時未聽到有啲咁嘅事，不過外電引述醫院發言人就話，負責培訓哈佛大學學生嘅Brigham，就睇緊同恒大合作起醫院嘅可能性。報道話恒大已經同醫院達成協議，仲選緊址添，仲話恒大計劃起嘅呢間醫院，會畀「特別優待」佢哋自己業主！
絲絲舊年年底都聽過呢個傳聞，話佢哋已經簽咗合作協議，成立哈佛綠色建築中心、哈佛免疫學及疾病研究中心等，開展綠色建築、健康醫療、應用科學等領域嘅科學研究同產業發展，當時估計選址可能喺廣州或深圳。
余絲韻