Market Insight：落後食品股再起動

數據結果支持美股連升兩周，上周五道指升126點，收報16,154點，整個二月以來第一次企喺50日線樓上，技術走勢好番唔少。新任聯儲局主席耶倫表明心迹唔急於退市，美金即刻無晒方向，近兩個月美匯指數在80至81.4之間橫行，意外見到金價矮仔上樓梯，上周五升至每安士1,318美元，去到近一季高位。由年初低位1,182美元起步計，累積彈近11.5%。

由大行資金流報告顯示，上周債券及股票基金都有進帳，反而商品基金已經錄得連續十四星期淨贖回。

古勝冇點你2014/02/17

萬里長空

金價趁有反彈鬆綁

儘管近期美國經濟數據顯示，天氣及季節性影響去年底至今年初經濟，資金由新興及商品市場回流的情況告一段落，但美英經濟開始復甦，歐洲都有見底迹象，資金由商品回到風險資產乃大勢所趨，睇番金價下降軌阻力在1,350美元附近，等反彈鬆綁的投資者要把握機會矣。

講番個市，預託證券預視港股今日有機會見22,500點附近，近兩星期無緣無故的V形反彈，同一月中失驚無神咁跌，原因都已經無謂細究，展望後市，恒指返回舊年九月至今年一月22,500至24,000點的大型上落區底部，來一個還原基本步。未知農曆新年前後，震走咗多少把持唔住的股民？

古勝主觀認為，中短線大市又返回泥漿摔角的悶局可能性唔細，周末地方兩會閉幕，22個省份調低GDP增長目標是預期以內，係咪壞消息出盡？屬觀點與角度問題，近期的A股反彈純粹出於二月A股IPO相對疏落，資金回流二級市場所致。對整體市況，古勝不敢過分樂觀，基金側重有概念配合股份，好似環保、新能源、燃氣及電訊設備股的機會仲係比較高。

中國肉食商「雙匯」，一三年越洋收購美國Smithfield Foods，組成全球最大豬肉食品企業，再轉戰香江，並改名萬洲國際，準備三至四月期間招股上市。

賓架界流傳的集資額介乎50億至60億美元，斷估將會係阿里巴巴上市前，最大規模集資。傳聞中承銷團仲要包括14間大行，包括7間保薦行，班底強勁。

萬洲上市帶挈雨潤

講到尾，一三年為咗做地上至強，雙匯鯨吞Smithfield Foods，47億美元現金收購再承擔24億美元債務，當中大部分是五年期以下過渡性貸款，明眼人都知呢鋪招股係只許成功。在下很好奇點解唔叫番雙匯而改名萬洲國際，公司網頁話取其含意「永恒」和「大洲」，可見其野心。

早有內地媒體話，萬洲除持有中國No.1雙匯發展（000895）73.3%、Smithfield Foods百分百股權外，上市想將Smithfield Foods持有37%的歐洲肉食商Campofrio增至全資擁有，實現成為中國及美歐市場龍頭。

同成熟市場如美國三強佔去一半份額相比，一三年萬洲、雨潤食品（01068）及大眾僅佔市場7%，隨着內地食物安全經常成為話題，政府着力整合行業，相信是萬洲近年南征北討的最大背後動機，如果萬洲一如傳聞，爭取30倍PE以上上市，看來一四至一五年業績有機會虧轉盈的雨潤，短期都有留意必要。

頁岩氣股未脫弱勢

上周四見報，古勝話鐵路股可留意博反彈，翌日板塊果有異動，中國南車（01766）及南車時代（03898）股價同升逾4%，中鐵（00390）及中交建（01800）升1%，且看本周升勢能否延續。

此外，好耐冇動靜的油服及頁岩氣股亦有異動，上周五宏華集團（00196）升4.2%、華油能源（01251）升6.3%、巨濤海洋石油（03303）升6.1%、TSC集團（00206）升4.2%、海隆控股（01623）升4.3%。

係咪炒作兩會前後有措施加快開發新能源如頁岩氣，不得而知，但板塊中多半股價走勢仍未脫弱勢，若未有利好產業消息配合，要提防炒風短癮，宜先觀察交投表現再作部署。

古勝