內地科網公司近年興叉隻腳入娛樂文化業，好似阿里老闆馬雲同騰訊都先後入股過內地電影公司華誼兄弟 ，今次搜尋巨擘百度創辦人李彥宏都唔執輸，決定親自出馬，投資籌組電影製作公司。
據《The Hollywood Reporter》報道，間新公司個名叫Aquamen Entertainment，總部會設喺美國洛杉磯，公司第一個項目係用4,000萬美元（約3.12億港元），拍部「西遊」題材嘅3D動畫。
雖然話今次呢部叫《Kong》（悟空）嘅電影，係以「西遊」為題材，講述孫悟空誕生嗰時嘅故事，不過，千祈唔好以為呢部戲係傳統神話故事，話晒部戲由科網界猛人出資，當然唔少得科幻元素啦！絲絲聽聞，動畫入面同時會出現外星人同機械人，仲有恐龍、飛碟呢啲荷里活「巨片元素」，個故事內容應該相當之天馬行空。
據聞，李彥宏已決定電影會由南韓動畫工作室製作，南韓導演金正中負責電影運作，不過製片方係中國，公司都希望搵個荷里活導演協助執導，估計導演人選等會喺五月康城影展，就會正式公布。
余絲韻