絲絲講場：冼國林過年變「宅男」
農曆新年唔想同人逼餐懵，唔少人會學「宅男」咁縮喺屋企。第一信用金融（08215）主席冼國林呢個假期就直情「宅」到底，連耗資上億計嘅煙花匯演都唔能夠令佢踏出家門半步。佢話煙花年年都咁上下，隔住電視螢幕睇都差唔多喎！
彈結他睇書出奇文靜
難得有新年假期放，喺屋企當然要唞一唞啦！平時功夫了得嘅冼國林，絲絲以為佢係唔停得嗰種，一定要周身郁，點知佢都有靜嘅一面。
冼師傅就趁呢個假期靜靜地睇吓書，彈吓結他，然後等班徒弟上門拜年！聽講一班徒弟仲帶咗兩隻龍虎舞獅上佢屋企拜年，不知幾咁熱鬧。
難得出關 招呼打唔停
不過，絲絲終於邀請到呢位「宅男」出嚟食飯。冼國林啱啱坐低，就有位高大猛男行埋嚟同佢打招呼，原來係冼國林嘅徒弟。餐飯已經食到尾聲，坐喺隔籬枱嘅男人又走埋嚟！原來係政經界名人王英偉，除咗拜年，當然係問吓依家入咗娛樂圈做藝人嘅囝囝王梓軒學功夫進度，見到冼國林笑晒咁，應該幾滿意呢位徒弟仔啩！
余絲韻