一向鍾意捐窿捐罅搵美食嘅蔡中虎，差少少就搭咗早排「被騎劫」嘅郵輪遊三亞，最終因為朋友嘅一句話而無報名，依家升咗職做中銀香港（02388）保險業務顧問嘅佢，日日朝九晚五，不知幾梳乎。
好多人貪搭郵輪夠悠閒，夠享受，蔡中虎就話之前打算報郵輪團遊三亞，成事嘅話，應該就喺搭早排「被騎劫」嘅嗰艘郵輪，最終決定「留港建港」，亦都避開咗上新聞。
佢自己就話郵輪唔埋岸梗係有原因，實在係諗唔到郵輪唔埋岸有咩好處啦！絲絲深信，就算蔡中虎有份上船，都應該唔會喺「劫船」嘅一分子！
尋日蔡中虎終於低調公開自己最新去向，原來唔係完全退休，而係由舊年十一月十二日起，事業就更上一層樓，榮升中銀香港保險業務顧問！中銀人壽執行總裁就由老友記－－老建榮接棒。
絲絲問保險業務顧問即係做啲咩？蔡中虎就話，「有人問，我咪顧囉！」咁無人問又點？佢就笑笑口咁話喺office睇吓各大新聞網，緊貼時事咁話！