農曆新年假期係電影院嘅黃金檔期，好多時戲院門外都逼到水洩不通。出名鍾意睇戲嘅統一企業（00220）董事長羅智先，都善用農曆新年呢幾日難得假期，盡情咁睇，不過佢唔去戲院，留喺屋企睇，唔使同人逼。
究竟佢有幾投入睇戲？聽聞喺短短幾日假期，就已經累積睇咗十幾部，可謂過得相當愜意！佢話，留喺屋企睇電影，唔使同人逼之餘，仲可以隨心挑選唔同題材嘅電影。
羅董熱愛睇電影，幾乎統一全部高層都知，絲絲之前都聽聞過佢曾經飛一轉美國，喺飛機上睇咗六、七部電影，完全唔使瞓覺。
至於電影類型，無論係文藝、偵探、武打、喜劇、舞蹈、音樂、勵志等各項題材都會睇，甚至對布袋戲呢類文創產業都相當有興趣，一句講哂，乜嘢類型都係佢杯茶。
余絲韻