孖妹S檔案：2014年八大關鍵詞
散戶以為炒股贏錢要講「貼士」，但今時今日嘅炒股致勝秘訣係講「關鍵詞」！好似去年股市熱爆多個金融Key words，例如「退市」、「比特幣」、「自貿區」、「城鎮化」、「節能環保」、「安倍經濟學」等等，個個關鍵詞都包含住黃金投資契機，如果散戶成功捕捉這些「關鍵詞」嘅「概念股」，相信可以過番個肥年！正所謂：「橋唔怕舊，最緊要受」，所以孖妹搵來四大重量級財金專家，公開其私伙二○一四年金融關鍵詞，等大家喺「詞裏行間」搵出新一年投資先機。
「科技專家」：新興技術創「錢」途
易方投資總監 王華：【機械人】
王：今年我有兩個科技關鍵詞，第一個係「機械人」。早前谷歌（美股：GOOG）收購一間專門研究和生產「超級機械人」嘅公司Boston Dynamics，我相信谷歌管理層已經預示未來廿年，自動化及智能機械人於各行各業嘅需求性，所以趁早部署。散戶覺得我睇好谷哥前景有啲老套，但呢間公司嘅業務創意性認真不容忽視，佢繼與德國奧迪汽車合作、研發Google Glass智能眼鏡及智能隱形眼鏡後，最近仲搞埋機械人，真係大把催化劑谷起股價。
彩兒：呢個概念充滿投資契機，可惜我無美股戶口呢！
【移動支付】
王：第二個科技關鍵詞就係「移動支付」！ 現時騰訊（00700）嘅移動支付組件——米大師（Midas），已經全面支持微信、手機QQ、手機Qzone等平台手遊，呢個組件集合微信支付、Q點、財付通、銀行卡、手機充值卡等多種渠道，仲支持埋國際渠道如Google Wallet、IAP等，我相信移動支付將可為騰訊帶來持續性兼強勁性收入。不過，我唔會提供以上兩隻股份目標價，因為炒賣科技股只有一個道理，就係股票有咩唔對路，就要即沽貨。
高妹：騰訊股價前景無限，但我個荷包銀両有限呢。
「對沖達人」：美市發掘潛力股份
著名對沖基金經理 錢志健：【電動車】
錢：Tesla（美股：TSLA）係電動車企業嘅龍頭，其股價由一三年一月中至今年一月中升約383%，表現令人喜出望外，我亦認為該股十分值得投資者留意。雖然現時電動車仲未係一個普及化嘅產品，但將來呢種車用概念會成為大趨勢，其實香港都已經有啲地方可以畀電動車去充電。至於內地嘅電動車製造商，我就唔會睇，亦唔會相信，因為內地太多產品可以造假了，如果踩中地雷陣就大鑊了。
彩兒：原來美股有咁多「潛力股」，我真係要去開個美股戶口至得了。
【新媒體】
錢：外國有間公司叫Netflix（美股：NFLX），專做網上租售及自選下載電影及劇集服務，以一三年底數據粗略地計算，該公司嘅全球串流下載服務用戶高達4,000萬個，而呢個串流下載收看模式卻是過去兩、三年才興起。雖然Netflix於○二年五月上市，但佢嘅業務成功在於擁有龐大客戶網，同埋可以向一些荷里活製作公司拿取戲劇播放專利權。如果佢能夠於將來開拓其他國家嘅串流市場，我相信呢隻股票就可以保持高增長。
高妹：一間租碟公司的市盈率竟然高達162倍，市場確睇好佢前景喎！
「基金教父」：港美股料陷上落市
交銀施羅德投資管理（香港）副董事長 雷賢達：【美股】
雷：受美國經濟復甦帶動，去年美股表現夠晒靚，但無疑已經升得太多，我估計今年道指唔會再有爆炸性升幅，當然要升多10%至20%都有機會，但中間會出現調整，不過大前提都係會保持高位，料道指於14,000至16,000點之間徘徊。睇番環球咁多個市場，我認為今年成熟國家嘅經濟表現仍會較新興市場國家優勝，現時我仲好擔心內地嘅金融體系問題，例如銀行隱性不良資產、產能過剩等，呢啲問題將會繼續困擾A股表現。
彩兒：看來今年都係要繼續避避A股喇！
【波動市】
雷：當美國一宣布加息，屆時本港資產價格一定會受影響而調整，我相信今年港股會以「波動市」為主，恒指將於20,000點至25,000點之間上落。雖然去年科網股及濠賭股跑出，上海自貿區等概念股亦炒過幾浸，但呢啲股份始終欠缺持續盈利增長支持，另外科網股估值炒得過高，相信今年股價有回調風險。而且經驗話我知，每年市場都會尋找不同板塊輪流炒作，建議散戶不妨留意去年股價表現較為落後嘅輸家，如出口股及商品股，它們或是今年賺錢王。」
高妹：今年恒指上下波幅有成5,000點，其實我炒吓牛熊證都得喎！
「波浪大師」：國策概念長炒長有
中信証券國際執行董事 林一鳴：【戶籍改革】
林：我相信內地政府將於上半年施行「戶籍改革」，首輪戶籍改革將牽涉國內二、三及四線城市，現時內地總共有1.5億農民工，假如佢哋取得戶籍，勢將喺衣食住行方面釋放大量消費潛力，屆時一定會利好內需股、家電股、醫藥股等，帶動呢啲板塊股價跑贏大市。而且戶籍改革並非一次性事件，當中過程需要分階段進行，所以我認為呢個概念可以長炒，散戶不妨從中尋寶，但記緊以各板塊之中嘅龍頭股為投資首選。
彩兒：戶籍改革絕對係個長遠政策，相信內需股、家電股及醫藥股有排炒呀。
【二孩政策】
林：去年內地政府決定放寬「二孩政策」，帶動不少嬰兒用品股及奶粉股被炒起。不過，我覺得「二孩政策」嘅概念仲未炒完，今年呢個關鍵詞絕對可以被市場翻炒，因為隨住嬰兒人口增加，相關消費支出一定有增無減。
除了利好內房、教育及醫療板塊外，嬰兒用品股及奶粉股勢必最先受惠，而散戶喺揀股過程中，除了買入個別行業嘅龍頭股外，有些奶粉類別半新股亦可以考慮吓。
高妹：哈哈，我之前入咗隻奶粉股，希望等多陣可以沽貨收成喇！