絲絲講場:雷賢達籌款妻兒做後盾

「基金教父」雷賢達(David)近年熱衷探訪各區中學,親自向基層嘅同學仔宣揚「知識改變命運」,其中佢就同大澳筏可中學特別有緣分。

早兩日David更大搞慈善電影活動,希望幫學校籌得逾一百萬款項,等學校可以增設教學設備。須知David乃係金融界嘅「教父級」人物,以佢嘅廣闊人脈,難怪當晚邀得不少猛人捧場啦!

幫筏可中學籌得百萬

不過,絲絲覺得當晚最耀眼嘅,唔係啲嘉賓,而係一直無限量支持David做善事嘅雷太及仔仔Brian。記得當晚,David一邊忙住派發卡通片《渣斯汀大任務》戲飛予嘉賓,而雷太及Brian就幫佢招呼朋友入場,一家人分工合作,最後呢招「全家出動做慈善」果然大成功,因為校方公布成功籌款100萬,David開心到見牙唔見眼,仲話未來一定會繼續支持弱勢社群添!

余絲韻