絲絲講場:宏利「鄭多燕」 教伙記保健

宏利人壽保險僱員福利業務部副總裁吳智珊一向形象百變,扮嗰樣似嗰樣,最近佢就參考近排爆紅嘅鄭多燕,跳咗1分鐘FigureRobics,做咁多嘢,無非想提醒大家喺累積財富之前,要Stay healthy!

其實宏利香港每年都會搞兩次代理人交流會議,並會邀請幾位公司主要業務嘅部門主管,回顧過去半年嘅成績之外,亦會向代理人介紹公司未來嘅新產品、新計劃等。要五千個Agent集中注意力聽你Briefing,少啲心機都唔得,所以吳智珊每一次都會度定個角色,隆重登場。

運動裝上陣跳勁舞

吳智珊加盟宏利香港至今,已經扮演過6個角色,好似早兩年電視劇角色「九姑娘」好Hit,佢就着晒古裝扮「十姑娘」,因為佢喺家族排第十喎!依家唔少同事都仲會叫吳智珊做「十姑娘」。聽講佢仲扮過盜墓者羅拉、埃及妖后,兩次都係坐住架戰車出場o架!

今期流行人物非鄭多燕莫屬,於是吳智珊參考過幾條網上短片,度咗段改良版,以一身運動裝示人,即場跳咗「1分鐘」舞,擺動腰肢,台下Agent不知幾Hyper!搞咁多嘢,無非想提大家有健康先有財富,為公司、客戶繼續打拚。

余絲韻