理財創富：孖妹S檔案︰證券行鬥揼本迎新歲

恒豐：賀卡枱曆涉費十萬

恒豐證券研究部董事林家亨：「恒豐年年都係印製聖誕及賀年卡、年曆卡、座枱曆及利是封，記得一○年嘅賀年品印製費用大約8萬蚊，但近三年相關費用已增至10萬，主要係設計費及印刷成本上升，不過呢啲屬於市場推廣費用，亦是對客戶嘅一份心意，所以不論市況好或差，呢啲錢點都要使出去。由於利是封及座枱曆嘅款式年年不同，所以費用增加主要出自設計上，好似今年座枱曆設計就以愛護地球為主題，希望可以向客戶提倡環保嘅重要性。」

老闆簽年卡有人情味

「不過，現時好多證券行都改用電子賀卡，但恒豐就覺得要保持傳統，始終電子賀卡令人感覺冷冰冰外，客戶亦可以隨手刪除，咁即係無用喇！但寄出聖誕及賀年卡就唔同了，老闆張華峰及其他同事都會簽上名字，人情味重好多。公司每年寄出6,000張聖誕及賀年卡，連郵費大約35,000蚊，都唔少錢o架。」

耀才 陳啟峰

致富 郭家安

耀才：賀年福袋總值百萬

耀才證券行政總裁陳啟峰：「今年耀才推出價值100元嘅賀年福袋送畀客戶，福袋內有掛曆、座枱曆、一套揮春及利是封，設計非常精美，派發量達十萬個，印製費用約100萬元。大家都知道耀才嘅上市編號是1428，所以利是封亦沿用此概念，印了『一世易發』，圖案除了花卉，亦有元寶及金錢，顏色以紅色和金色為主；揮春則印有一副對聯，上聯是一世富有，下聯是代代無憂，總之一切都要好意頭喇！」

凱基 鄺民彬	散戶李生	散戶Rita

連續兩年請睇好戲

「過新年最緊要好玩，所以耀才今年連續第二年出資30萬元買入3,000張戲票包場兩日請客戶去睇賀歲片，客戶可以帶埋親戚朋友去睇場好戲，輕鬆一下。至於新春開市後，旗下各分行亦會舉行現金大利是抽獎活動，利是由50蚊至500蚊不等，叫做小小意思兼心意，最大目的都係希望客戶可以發個新年財，之後喺股票場上可以再賺多啲！」

致富：斥廿萬印利是封

致富證券資產管理部董事郭家安：「為滿足客戶嘅新鮮感，致富嘅利是封設計年年都會有所不同，但主題圖案均離不開花卉，因花開富貴夠好意頭嘛！而周松堦老闆更為利是封設計一句充滿心思嘅祝賀詞：家家致富，戶戶發財，更是沿用至今，好似枱面上嘅利是封有七個，就代表住公司過去七年嘅業務成長，每年我們都會派發約十萬個利是封予客戶，印刷費用約20萬元。」

「糕糕」興興攞個意頭

「致富向來重視與客戶嘅關係，更視客戶如家人，所以過去幾年我們特別購入年糕及蘿蔔糕送給特選客戶，該項費用大約5萬至8萬元；去年我們更加特別訂做『招財進寶』茶具送給VIP客戶，該套茶具以骨瓷及黃金所造，價值3,000元以上，現在呢套茶具已經係絕版物品了！其實我們喺不同佳節都會送禮畀客戶，好似中秋節送月餅，新年就送蘿蔔糕，而新年過後嘅第一個港股交易日，我和同事亦會落行向客戶拜年兼派利是，計埋新年印刷品及禮物開支約80萬。」

凱基：十萬個「發」贈客戶

凱基證券營運總裁鄺民彬：「今年利是封設計一套共有五款，五個利是封各印有五個不同『發』字，由古代象形文字嘅小篆演變成繁體隸書以至更現代嘅書寫方法，藉此代表母公司中華開發金控業務之成長，同時『發』字亦包含『恭喜發財』嘅祝福。基本上，凱基每年都會印製利是封畀員工、股票經紀，再由他們轉贈證券行客戶；印製量方面，每年均為十萬個，費用大約五位數字，製作費用主要視乎不同設計風格而定。」

座曆設計燃亮未來

「而座枱曆嘅印製數量約為六千，為保持與台灣總公司嘅一致性，座枱曆設計同樣以『Light up your future』作引子，意指儘管市場脈動瞬息萬變，凱基對客戶、社會嘅關懷與承諾卻未曾改變，為客戶照亮財富未來。最值得一提的是，座枱曆內頁部分嘅每個月份，均印有凱基香港、台灣及泰國同事嘅攝影作品及文字描述，表現公司重視『以人為本』嘅經營理念。」

高妹： 走勻咁多間魚缸，我拎拎埋埋嘅座枱曆同利是封接近百個，而且啲款式又鬼咁靚，真係開心喇！

彩兒： 嘩！你拎咁多真係用得着先好呀，雖然唔使錢啫，但都唔可以浪費o架嘛，好似散戶李生同Rita就做得好喇，用幾多拎幾多。

散戶李生：控制印量以免浪費

「每年我大約派300封利是，所以都好需要利是封，以前我喺一家證券行度坐，臨近過年之前，佢都會擺定一份喺我枱面，但呢兩年我轉咗魚缸炒股，都無特別返去拎囉！雖然券商送呢啲小禮物畀客戶係一份心意，但其實唔使印太多嘅，以免印太多又派唔晒嘛，咁就浪費喇，而且對於每日炒股幾百萬上落的散戶而言，他們未必會拎，但啲婆婆、師奶就好鬼鍾意。」

散戶Rita：座枱曆方便勝手機

「我就最鍾意拎座枱曆，夠實用嘛，我會客廳放一個，睡房又放一個，有時真係睇座枱曆仲方便過睇手機o架。其實我覺得券商每逢新年時，都印製呢啲小禮物畀客戶幾好呀，因為客戶真係有需要用到，當然我亦唔會逐間魚缸去拎喇，呢啲又唔好太貪心，自己要計過條數，用幾多先拎幾多，千萬唔好浪費！」