絲絲講場：恒生騷金幣重一噸
話就話金價走勢麻麻，但畀你見到大大舊嘅金幣，都係會撲過去，更何況係一噸重嘅金幣！恒生銀行（00011）接連兩日都會展出世上最巨型金幣，呢個金幣有成一噸重，足足等於200包5公斤大米，恒生執行董事馮孝忠話，銀行已經做足保安措施，唔驚畀人偷。
呢一個「2012年Australian Kangaroo One Tonne Gold Coin」係面額100萬澳元嘅澳洲法定貨幣，由澳洲珀斯鑄幣局發行。今次專登到香港展出，只因恒生同珀斯鑄幣局合作多年，有番咁上下交情。
價值3億 唔講點搬
絲絲驟眼望落去見個金幣暗淡無光，仲以為佢係假嘅添！不過，馮孝忠斬釘截鐵咁話，呢個金幣由足1噸嘅99.99%純金鑄造，而且，截至一月八日，呢個金幣嘅價值已超過3.05億港元！
依家呢個金幣就放喺恒生總行24樓，絲絲諗極都唔明，究竟點樣將呢個1噸重嘅金幣運上樓，恒生嘅同事就話係秘密。哈哈，點樣運上樓緊係唔講得人知，容乜易有人照辦煮碗運走佢！
馮孝忠就笑笑口咁話，銀行同珀斯鑄幣局聘請咗大量保安，加上金幣極具分量，要偷都唔係易事！
正因為保安問題，今次只係得恒生邀請嘅客戶先可以一睹呢個健力士世界紀錄最大同最重嘅金幣。獲邀請嘅你，快啲去睇喇，因為呢個金幣過兩日就飛去柏林參展喇！
余絲韻