絲絲講場：「超人」穩坐香港首富

以往呢個榜都係由發展商「壟斷」，不過時代變咗，好幾位地產富豪身家縮咗水，長實（00001）主席李嘉誠，身家有增長之餘，仲繼續坐首富之位，可能同佢投資頗多科網公司有關，而且佢投資科網，永遠行先人哋好多，投資嘅項目有Facebook、Spotify，甚至係美國Bitcoin交易平台Bitpay。

最新排名榜中，李嘉誠嘅身家增長達20億美元，總身家達到約320億美元。

「四叔」身家排第三位

至於同樣係地產發展商，人稱「四叔」嘅恒地（00012）主席李兆基，就排第三位，身家達約200億美元；新地（00016）郭氏家族就排第四位，身家達175億美元；至於新世界發展（00017）「彤叔」鄭裕彤就排第五，身家155億美元。

李嘉誠旗下嘅長和系，咁啱尋日舉行周年晚宴，絲絲問咗好多熱門話題，李生話驚講半個鐘，都唔肯畀佢走，惟有所有問題都唔答。

長和系晚宴超熱鬧

尋晚就犀利喇，筵開過百席，出席員工多達1,700人。至於有咩抽獎禮物，公關就大賣關子，但人人有份，往年就有同事抽到金幣同電視機。

公關仲話晚宴無表演嘉賓，大家最期待就係誠哥嘅演講，同埋排隊同李生合照。

余絲韻