想當年，喬丹喺華爾街擔任股票經紀，26歲賺到數千萬美元財富，但金錢世界讓人貪得無厭，最後佢因為股票欺詐入獄。投資市場永遠是「贏面有限，風險無限」，金錢利誘容易令人出賣善良靈魂，其實華爾街又何止一隻貪婪的狼呢？正如呢幾位「狼人」與魔鬼交易嘅故事，絕不比《華爾街狼人》遜色！
投行於華爾街絕對係財富、權力與地位嘅核心地，近年最令市場震驚為摩根大通嘅「倫敦鯨」事件。摩通有一名綽號「倫敦鯨」嘅交易員Bruno Michel Iksill因押注經濟復甦，大手出售與一籃子企債掛鈎的CDS（信貸違約掉期），但相關CDS價格逆勢而行，拖累摩通慘蝕逾62億美元。
當大家以為事件屬人為錯失，美國檢察部卻起訴摩通兩名前僱員Javier Martin-Artajo及Julien Grout，二人被控告串謀、證券欺詐、提供虛假帳冊和紀錄、電匯欺詐和遞交虛假文件共五項罪名，可見不法分子無處不在，防不勝防。
金錢世界點可能無美女身影呢？去年三月，紐約警方拘捕有「曼哈頓夫人」之稱嘅格里斯蒂納（Anna Cristina）。
呢位師奶外表平凡，更是一位擁有四名孩子嘅好媽媽，有誰估到佢竟是曼哈頓區操縱數百萬美元賣淫集團嘅主腦，旗下擁有50名應召女郎，專為政客、律師及華爾街銀行家、基金經理等提供賣淫服務！而電影《華爾街狼人》亦有不少嫖妓、吸毒、酗酒等情節，再次證明「電影世界反映真實生活」！
○八年環球市場爆發金融海嘯，亦爆發華爾街有史以來最轟動嘅「世紀龐氏騙局」，男主角係前納斯達克交易所主席馬多夫（Madoff），佢利用20年時間精心設下騙局，訛騙金額逾500億美元，受害者包括不少政商界嘅名流人士，就連滙豐銀行、法國巴黎銀行等國際大行都逃唔過魔掌。
翻查資料，馬多夫嘅訛騙方法主要利用短期暴利作為誘餌，把新投資者嘅錢支付舊投資者嘅回報，從而不斷誘騙更多人投入騙局。馬多夫身為政界及股壇風雲人物，地位德高望重，但都犯下彌天大罪，足見人類貪婪欲念無窮無盡。