美國華爾街，紙醉金迷又「狼群」處處嘅金錢世界，若你心存貪念歪念，將隨時身敗名裂。最近美國上映電影《華爾街狼人》（The Wolf of Wall Street），故事為華爾街青年奇才喬丹‧貝爾福特（Jordan Belfort）自傳，描述佢透過買賣股票致富，亦因為股票欺詐案入獄嘅傳奇故事。金錢乃萬惡之源，人性貪婪，欲望無限，我哋作為散戶更應防範魔鬼引誘，慎防變做「小紅帽」，成為「狼」的點心。
黎：獨立資深股評人 黎永良
李：大唐金融高級副總裁 李惟宏
譚：中投証券（香港）經紀業務副總裁 譚梓業
孖妹：當年你哋能夠踏進人才輩出嘅華爾街，果然實力雄厚！
黎：八八年至九二年，我在花旗銀行做嘢，經常去美國出差，試過留喺華爾街長達三個月，我感覺到華爾街臥虎藏龍，人人有學識，反應又夠快，只要你有學識、膽識、時機及運氣，真係可以好快進身富裕階級嘅最上層。
李：因為家族事業做金融，令我從小對華爾街已有憧憬，更希望長大後可以投身當中工作。○三年我在美國巴德學院經濟學系畢業，順利加入美盛集團，○五年就轉去花旗工作，呢幾年我真係大開眼界，見識到投行對所有員工嘅要求都非常高，可以話係唔會容忍有蠢人存在，令我對華爾街嘅想像由膚淺轉為現實。
譚：九二年我喺美國讀書，有機會去國民西敏寺銀行（National Westminister Bank）做實習生，不過我負責做外匯結算，呢個部門於華爾街嚟講，一定唔會賺大錢，但我一樣大開眼界，因為我見識到不少金融奇才，發現華爾街真係一個金融行業發展最蓬勃嘅地方，好似九十年代時期，美國已經有窩輪等衍生工具，但當時香港好多人仍然唔知咩叫窩輪添！
孖妹：入到華爾街工作嘅人一定唔係蠢o架，點解仲會行差踏錯o架？
黎：八十年代嘅華爾街可以話「無王管」，灰色地帶令犯法空間好大，只要你夠膽有歪心，好易就做不法之事。正如「華爾街狼人」喬丹，佢做嘅壞事只係冰山一角，無畀警察拉到嘅非法分子大有人在。不過，自從○八年金融海嘯爆發，雷曼兄弟執笠，不少國家都嚴厲收緊金融體系嘅監管措施，金融漏洞少咗，令股災爆發機會率減低，但唔代表股災絕迹，因市場永遠有第二批新人上場。
李：華爾街有不少企業都係每季公布業績，金融從業員一方面要與同事競爭，一方面又要幫公司賺錢，工作壓力非常大，有時候為咗跑數或者上位，有部分人真係會透過灰色地帶進行不道德行為，好似做假帳咁。
孖妹：華爾街紙醉金迷，充斥財色酒氣，難得你哋無誤入歧途。
黎：我29歲做副總裁，年薪過百萬港元，算是好年輕已經名成利就，仲點會走去做壞事呀！只有年輕又無錢嘅人，先至最易受到金錢引誘，誤入歧途。記得嗰時，因為班外國人知道我唔係長駐華爾街，唔會同佢哋爭飯食，大家先至有講有笑。
李：對我而言，華爾街真係環球金融市場嘅一哥，年輕人要投身當中500強嘅國際大行，絕對要「過五關斬六將」，個人要醒目，亦要識得隨機應變，因為當地金融產品及創新真係變得好快！不過，正因為呢個金錢世界轉得太快，引誘又多，所以自我要求道德底線一定要好高，工作時亦不要盲目追求極大回報而導致疏忽風險，否則最終只會「聰明反被聰明誤」。
譚：我做外匯結算，好難變富貴人物，做股票Broker就可以搵快錢喇，佢哋接受資訊最多，可以偷時間做手腳。當年我喺華爾街留咗兩年就返香港發展，全因有自知之明，我又唔係哈佛、耶魯畢業，人際脈絡又唔夠，好難喺華爾街生存o架！但我好開心曾經喺華爾街工作過，當年自己做過逾幾十億美元嘅外匯結算，如果換轉在香港，邊有機會接觸呀，嗰段日子真係我金融生涯之中嘅無憾！
高妹、彩兒
若有料報畀高妹同彩兒或有嘢問，可電郵money.biz@opg.com.hk