恒生銀行（00011）薛關燕萍（薛太）今日榮休，辭任該行執行董事及中國業務主管嘅職務。絲絲相信，既然薛太已經打好基礎，即使佢唔再帶領恒生上下，相信恒生中國業務都一定會繼續壯大嘅！
薛太係滙豐系嘅老員工，佢喺一九七六年加入滙豐銀行，二○○五年起被調往恒生，四年後獲委任為恒生中國行長，主責睇內地業務。
現年61歲嘅薛太其實早已屆退休之齡，據聞佢今年初獲邀延任一年，之但係最終都係改變唔到佢要離開呢個大家庭嘅局面。
恒生銀行尋日出咗新聞稿，特地多謝薛太多年嘅貢獻，尤其係佢為恒生中國業務發展奠定良好基礎，睇得出呢幾年薛太幫恒生中國打江山有幾咁盡力。
薛太榮休，其實有迹可尋，最近半年，佢已經開始Step down，今年八月下旬，恒生就宣布，薛太由恒生中國副董事長兼行長、恒生非執行董事，調任為執行董事兼中國業務主管，行長之位就由林偉中接棒。
為咗支持內地業務擴展，早排恒生就計劃向旗下恒生中國增資20億元人民幣，絲絲問過吓分析員，今次增資後，應該都夠恒生中國喺內地未來兩、三年嘅發展所需。錢又有，人才又大把，恒生中國業務應該繼續蒸蒸日上。