SOHO中國（00410）董事長潘石屹，同就快離任美國駐華大使嘅駱家輝，好似無乜關連，原來有一樣運動，喺佢兩個都好鍾意，但後生啲嘅潘石屹，就輸咗畀駱家輝。
唔知大家有冇聽過平板支撐（Plank）呢項訓練核心肌群嘅運動？據聞每日堅持做可以同大肚腩講Bye bye，平坦嘅小腹重見天日。據講目前Plank最長時間紀錄為1小時20分05秒，專家話，若能堅持兩分鐘以上，都是英雄。
潘石屹喺微博中，「晒」咗一張照片，顯示佢正同駱家輝一齊玩平板支撐，佢哋有一位共同嘅健身教練，所做嘅訓練都係一樣。照片中，潘石屹做標準嘅平板支撐動作嘅同時，駱家輝就做「升級版」，只用一隻手。難怪，潘石屹要以「超人嘅毅力」形容佢。
駱家輝點犀利法？潘石屹喺微博咁樣形容：「駱家輝今年64歲，我做1分鐘平板支撐時，他就能做51分鐘，他有超人的毅力。現在我也能做到10分鐘了，腹肌開始顯現。」潘石屹仲話，做Plank連奧運冠軍林丹都唔係佢對手。
除咗運動之外，潘石屹都好樂意喺微博分享其他有助身體健康嘅心得，例如分享果蔬汁減肥法，聲稱一周可減六斤。
不過，呢個飲食方法就畀營養師狠批。到底潘石屹嘅健康療法有效與否，有待一眾網民驗證。但肯定嘅是，潘石屹微博嘅追隨者數字又增加不少。
余絲韻