孖妹Ｓ檔案：跟富豪指標投資包贏?

「富豪組合」賺兩成Easy Job

彩兒：據聞你都知道「億萬富豪指數」，散戶跟風買貨掂唔掂先？

黃：呢條指數表現好勁o架嘛，我覺得值得大家參考呀，基本上指數內嘅股票都屬於價值型，公司嘅業務成熟、生意網絡穩定，長期性有盈利增長，對於部分「盲中中」嘅散戶而言，真係不妨跟住指數嘅頭十隻股票去買，假設你拎一百萬本金出嚟，每隻股票投資十萬，我相信每年賺20%回報率並唔困難。

過去六年「億萬富豪指數」與「標普500指數」表現比較

孖妹醒你十隻聖誕股

長線策略要唔怕悶

彩兒：參考價值咁高，你有無跟住買埋一份呀？

黃：我又唔係億萬富豪，若然投資本金唔夠雄厚，買呢啲價值型股票真係好難賺大錢，但呢班富豪級人馬就唔同，佢哋擁有雄厚本錢去做呢種投資組合，心理質素又勁，更唔會因為Google（GOOG）股價升咗十格就同你走貨，人哋賺嘅係發達咗嘅發達錢！好似巴菲特，佢永遠都有30%現金在手，第一保留實力，第二可以趁股市大跌時掃平貨，畀着啲散戶面對大跌市，仲唔淆底咩？人人都知大跌市要入貨，但談何容易呀？

彩兒：整鬼你呀？散戶夠唔係億萬富豪喇，你唔買但又叫我哋跟住買！

黃：事實上呢種投資組合打法先係王道，我覺得買入呢啲股票好合理，而我擺明係攻擊型炒家，雖然密食當三番，但有自己嘅揀股策略及做法。但一般散戶嘅炒股心理係，長線投資話悶，短炒投資話「Chok」，如果你日炒夜炒，每年都係賺得20%，咁不如嘗試跟住呢條指數買貨，投資策略簡單，回報率又夠穩定性。不過，現時指數內持貨最多為蘋果公司（AAPL），我就唔多睇好，反而鍾意雅虎（YHOO）同通用汽車（GM）。

彩兒：咁買富豪股有無風險o架？

黃：唔好以為價值型股份嘅防守性就好強，好似金融股、科技股嘅上下波幅就可以好「Chok」，股價隨時可見20%以上調整，股神就話有大把本錢去頂住姐，甚至趁機再掟錢入市買貨，但大部分散戶卻無膽去捱大跌市，反而會驚到沽貨離場，可見投資成敗在於心理質素強弱。

回報超卓靠揀股眼光

高妹：身為對沖基金經理，你對「億萬富豪指數」會唔會有另類看法？

應：投資要獲勝，重點在於投資能力與心態，而非技術分析，我覺得基金經理能在市場上獲利有兩個原因：第一擁有判斷企業優劣嘅能力，第二擁有善於控制情緒嘅能力，前者幫你揀出好質素嘅股票，後者幫你應付驚慌、貪婪等負面情縮，避免做錯投資決定。

高妹：呢條指數內的企業是優是劣？

應：「億萬富豪指數」包含嘅股票類型都係經過時間考驗嘅大型企業，而且該指數由○五年就開始跑贏標指，就算○八年金融海嘯報跌，其跌幅都少過標指，可見指數所持有股票及營運策略是可行的，投資方法值得大家信賴。

散戶「跟風」化弱為強

高妹：聽你咁講，我真係「跟風」都跟得安心啲。

應：但我覺得「跟風」不是最好嘅投資策略，最好嘅投資策略是自己擁有揀好股票嘅能力，不過每個人嘅投資水準不一樣，如果散戶知道自己無專業判斷能力，也不能良好管理個人情緒，那不妨喺呢條指數內揀啲股票去買，由於散戶資金有限，所以股票數量可控制在10至20隻，並分布不同行業，讓投資風險可作分散。

高妹：不如你畀啲貼士我，點樣先可以靠自己能力揀好股呀？

應：其實基金經理跟散戶所能接收嘅資訊大同小異，但為甚麼一般散戶不能成為股神呢？關鍵點在於散戶投資專業和情緒管理能力有限。對我而言，基金投資有三大過程：（一）篩選股票；（二）投資建議；（三）中長線持有，在選股過程中，第一要看管理層品格；第二要看這個公司嘅競爭優勢；第三是看公司估值是否便宜；第四就要看整個市場大趨勢。

「億萬富豪指數」嘅吸引之處在於跟蹤華爾街市場最大贏家（股神或基金經理）所投資嘅股票表現。正所謂：「三人行，必有我師焉」，現時我哋嘅「老師」全部都係金融界嘅投資大師兼大富翁，好似有「股神爺爺」巴菲特（Warren Buffett）、「沽神」普爾遜（John Paulson）、「對沖基金操盤手」泰珀（David Tepper）、「破產重組之王」羅斯（Wilbur Ross）以及「對沖基金大佬」艾肯（Carl Icahn）等等，陣容如此「神級」，難怪本港兩位基金經理都話「跟得過」啦！

（高妹）（彩兒）

若有料報畀高妹同彩兒或有嘢問，

可電郵money.biz@opg.com.hk