絲絲講場:光行攤開「回報」畀人睇

光大銀行(06818)香港上市夢,終於實現!呢個上市工程,大大話話搞咗超過十年,難怪光大集團董事長唐雙寧,見證呢個歷史性時刻嘅時候,咁興奮啦,佢哋揀選畀港交所(00388)嘅紀念品,好有深層意義呢!

港交所禮物就收得多,但光行呢份絕對獨一無二,由唐董事長親自操刀,揮筆提出「回報」兩個大字,筆筆有力,外行人絲絲都完全感受到有番咁上下水準!

「回」歸香港 「報」答股東

幅字畫由光行兩位同事幫手拉開,喺台上畀我哋欣賞一番,再送到港交所同事手中,企喺台上嘅唐雙寧貫徹佢熱情奔放嘅作風,一手拎起支咪,興奮地向現場觀眾解釋幅字畫嘅寓意,佢用雄亮嘅聲音話:要「回報香港,回報股東」。

呢幅字畫睇落十分眼熟,原來光行開上市記者會嗰陣,唐雙寧因為要開會,唔能夠親自出席,已經喺佢段愛心影片度晒過一次佢嘅真迹,都係「回報」兩隻大字,話送畀光行祝賀佢哋上市成功,「回」字代表「回家」,回到光大發源地嘅香港;而「報」字代表「報答」,意味光大再創佳績,報答股東支持。

兩星期火速搞掂IPO

今次光行趁年底個市夠熱,極速以兩星期時間做晒所有上市工作,以免節外生枝,絲絲都一直替佢哋緊張!依家終於可以飲得杯落,希望真係好似熱情如火嘅唐董事長所言,光行可以回報一班對佢哋支持到底嘅股東,用行動去擺脫「明燈」呢個封號,唔再做藍燈籠。

余絲韻