三星同蘋果公司（Apple Inc.）日鬥夜鬥，絲絲最近聽聞三星挖走咗Apple Store一位著名店舖設計師，去擔任三星副總裁兼零售業務總經理。三星究竟係想「Apple化」，抑或純粹削弱對手能力呢？
被挖嘅設計師Tim Gudgel，曾經幫Apple設計美國曼哈頓西區一間Apple Store，呢間店嘅特色係彎形玻璃頂，已經變為專利技術，仲歸佢所有，可見佢實力非凡。
不過，三星暫時未有透露Tim嘅職責，未知係咪同喺美國開自家店有關。
目前三星喺美國並無零售專門店，但就有同當地零售商Best Buy合作，喺店內設三星體驗迷你商店，客人可試用三星嘅智能手機同其他電子產品，店內亦有專員教你點用啲產品。
畀人挖角已經夠慘，有研究公司啱啱仲發表咗一啲幾打擊Apple嘅數據。數據顯示Android手機應用程式商店Google Play，正分薄Apple App Store塊餅。以上個月計，雖然 Apple App Store每日二百大收費Apps貢獻1,800萬美元，按年增加兩成，亦較Google Play每日1,200萬美元收入為高，但Google Play去年同期僅錄350萬美元，即係話一年來增速驚人！
同時，Apple智能手機今年第三季嘅市佔率由去年14%降至13%，而Android手機則由75%升至81%，Apple可謂受雙重打擊，嚟緊要攝高枕頭諗諗計先得！
余絲韻