Market Insight：熱爆新股密切留意

不過，近幾日高開低收或低開高收的例子不少，就算聯儲局暫時唔收水亦非甚麼好消息，因為退市預期會順延下個月，正所謂「過得初一，過唔到十五」。

恒指繼本周一後，再次跌穿23,000點後倒升收市，恒指23,000點好似成為近期「鐵底」，惟沽空金額連續三日超過一成，雖謂空軍激增睇往績成敗只係一半半，但不能不抱戒心。議息完之後到基金經理放聖誕新年長假，成交肯定進一步減少，大戶挾上或挾落毋須太多子彈。今年基金經理成績大豐收，年尾粉飾窗櫥亦可慳番。

古勝冇點你2013/12/19

萬里長空

中移好消息出盡

滬綜指已經7連跌，跌幅雖不大，但屬陰乾格局，上海股市成交創一年新低，人行停止逆回購、上海同業拆息一路挾高都屬負面消息，錢荒每半年一次，大家相信不會忘記六月底時之恐慌情況。

港股相對表現不算太弱，恒指及國指昨分別升74點及67點，尤其與A股走勢息息相關之內險股依然強勢，但火車頭非和黃（00013）莫屬，有消息稱和黃已委任投行準備明年分拆屈臣氏上市，股價升3.3%創二○○○年以來新高。昆侖能源（00135）四個月換兩個董事長，股價跌近3%收市。

早兩日話中移（00941）無謂撈底，如果今次再跌穿80蚊又反彈的話即會形成「三底」，但發埋4G牌兼賣iPhone都好消息出盡。中移昨公布明年4G大計，包括將計劃出售1.9億至2.2億部手機，暫時仍未有提到iPhone，但賣得愈多手機意味愈多手機補貼支出。

另外，中移亦公布同蘇寧、國美（00493）、聯想（00992）、京東及天貓等10家終端銷售渠道商簽約；同日，中移終於落實17家虛擬運營商名單，名單又有蘇寧同國美份，蘇寧同國美在門市店會幫中移sell定幫自己sell呢？對於聯通（00762）和中電信（00728）來說，橫豎競爭形勢不及中移，虛擬運營商可以當作多個分銷渠道；但對中移而言，則可能是「多隻香爐多隻鬼」。

明年新丁料大減

今日又有5隻新股上市，明日更加有6隻，光大銀行（06818）上埋就可暫時休息，剩低兩隻細嘢作最後衝刺。新股衝鋒一段之後，下個禮拜個市相信亦會見真章。明年新股肯定會大幅減少，全世界焦點放在阿里巴巴集團身上，亦有一些「特殊口味」，包括英國貴族學校、迷你倉及海味舖都計劃上市。玩新股一炒貨源歸邊，二炒特殊概念，信義光能（00968）寧願唔集資以介紹形式上市自有其因由，睇股價就明白甚麼叫除笨有精。

福壽園（01448）認購反應熱烈，執筆時見其暗盤價升五成有多，暗盤成交都過億銀，真係唔簡單！論估值隻股唔算便宜，但目前香港魚缸關於殯葬類別股份選擇有限，概念股都係炒供需關係，時勢做英雄，好難預測到邊個價先為之到價！

炒影子股怕短癮

事實上，生老病死乃人生必經之路，隨着社會人口老化，殯葬行業需求增加。過去，呢個行業發展較分散，如今趨向企業化、規範化，長遠確具發展前景。

古勝還記得○九年九月九日創業板新股中國生命（08296）掛牌，就係炒呢個概念，當年隻股係全配售，發售價0.72元，掛牌唔使一個月股價炒到上4.24元，真係瘋狂！但當然，炒概念還炒概念，熱情退卻，公司股價升勢能否持續，還是要看公司本身的經營同管治表現，畢竟投機同投資是兩回事。

昨日同屬呢個板塊的現成股份冇大變化，安賢園（00922）冇升跌，收報0.275元；中國生命升2.9%，收報0.35元；勤達集團（01172）下跌1.2%，最後收報0.234元；北海集團（00701）無升跌，收報0.345元。看來影子效應消失後，股價表現又重回基本步。

古勝