相信大家都知道人民幣有升值潛力，宏利資產管理（亞洲）執行總監及定息產品高級基金經理陳景濤用咗一個好好嘅比喻，佢話以前拎住印有獅子銀行嘅100蚊港紙就好威威，但依家人民幣先係機遇，銀包無番張毛主席都唔掂喎！
人民幣今年都升咗至少2%，升幅都甚為可觀，之但係，仲可以升到幾盡先？陳景濤就話，身邊啲朋友年年都問，但係人民幣年年都升，差在升幅有幾大！佢估計，每年應該都有1.5至2%嘅升值空間喎！
陳景濤尋日就抆咗張100蚊港紙，同埋100蚊人民幣現鈔出嚟，即興講咗個故事。話說呢隻獅子，係萬獸之王，去羅湖城Shopping都有Discount，直至聰明嘅人類出現，獅子想拎折頭就無咁易啦！佢無非想講，人民幣有好大升值潛力，中國高增長故事有幾咁吸引，港紙唔係唔好，只係依家袋人民幣就仲好！
人民幣的確係一個放在眼前嘅機遇，所以連陳景濤都話，銀包點都要有張毛主席！計絲絲話，銀包無毛主席唔緊要，最緊要係投資組合有就得啦！
余絲韻