摩根士丹利趁聖誕唱歌籌款，已經搞咗好多年，籌款數字仲一年比一年多添，今年嘅「摩根士丹利董事合唱團」已經連續第11年，並且係連續17年支持「愛心聖誕大行動」（Operation Santa Claus），今年再破紀錄，總共籌得逾320萬元。
尋日大摩亞太區聯席首席執行官Bill Strong負責領唱，帶領台上由同事贊助嘅逾六十位高層唱畢八首聖誕歌，全程仲有香港保護兒童協會嘅小朋友伴唱，加上現場唔少圍觀者都唱埋一份，聖誕未到，氣氛已經十足。大摩全球援助服務主題一向為小朋友健康着想，而今年籌款對象就係「彩虹計劃」，主力為患有自閉症嘅兒童走出黑暗。
其實，大摩仲有好多同事想為慈善出多幾分力，所以舊年開始公司同事合力搞多咗個甜品籌款行動，就係由香港同事親手炮製愛心蛋糕或甜品，經內部網上拍賣競投，凡出價者無論最終係咪投到，都會捐出善款，所以大摩上周一連五日，每日推出三至五款自家品牌蛋糕，連埋董事合唱團嘅善款，就成就到捐款高達逾320萬元呢項壯舉，據悉，有蛋糕嘅競投價最高紀錄係2.4萬呢。