有消息指阿里巴巴創辦人馬雲，近日喺南韓同三星高層會面兩小時，不過就冇人知兩間科技巨擘究竟傾咗啲咩，當地傳媒好多揣測，經絲絲抽絲剝繭後，發覺好多說法都講唔通。
馬雲今次出訪南韓，仲見咗Line母公司Naver，同埋當地龍頭電訊商KT，不過焦點仍然喺三星身上。有南韓媒體就估阿里想搵埋三星一齊研發穿戴式裝置，同Google嘅「Google Glass」對撼，仲講到阿里已經靜靜雞製作呢個裝置，希望喺不久嘅將來推出，所以尋求IT公司好似三星咁密斟。
所有傳聞阿里嘅官方發言人統統都無回應，指馬雲嘅Schedule係唔會對外公布，亦都唔會評論市傳消息，但絲絲喺阿里返工嘅朋友，就話無咁嘅事！
絲絲仔細睇番篇報道，發現真係有啲「流」，其中一個講法，係話阿里想為自己嘅電商平台發展一個新嘅OS系統，所以搵三星幫手，查實阿里早就有一個手機操作系統。
另外，三星亦一直暗地裏研發一個屬於自己嘅智能手機OS系統「Tizen」，希望擺脫Google，早前「誠哥」接受訪問時亦透露玄機，指即將有嘅新OS系統面世，市傳好可能就係Tizen！
所以報道指三星同阿里合作搞OS系統就應該唔係真，同時令呢篇報道嘅可信性更低。