央視嘅《每周質量報告》近日指，內地嘅房地產公司竟然「欠繳」高達3.8萬億元人民幣嘅土地增值稅，個數咁大，難怪一班房地產發展商齊齊抗議。
華遠董事長任志強仲喺微博度批評央視「愚蠢同無知」！不過，一眾網民就唔多Buy任大炮嘅觀點，反而勁Buy央視呀！
報告引用咗法律專家同國家部門嘅數據分析，指出房地產企業喺○五年至一二年期間，一共「欠繳」3.8萬億元。雖然報道入面冇點名批評係邊間公司，不過就話到明當中涉及45間喺中國境內、外嘅上市公司。
呢個指控即時觸動業界神經，任志強唔單止喺微博上鬧爆央視，尋日發起業界召開緊急座談會，批評央視，任志強仲話早喺五月時已經有報紙登過類似嘅報道，不過大家都認為報道失實，所以唔多重視，點知央視「照辦煮碗」做返同樣嘅嘢，做法「非常愚蠢」！
不過網民似乎就唔Buy發展商！新浪嘅調查，有超過七成網民都認為央視報道屬實，同樣有超過七成嘅網民唔信任志強嘅觀點呀！網民有咁嘅反應，多數係因為樓價升得太快，好多人買唔到樓，仇視發展商，就算真係央視錯，都唔多同情發展商！
余絲韻