絲絲講場：莎莎新產品老闆都幫襯
絲絲一向知道莎莎（00178）老闆郭少明同埋郭太好識做生意，每次業績會郭太打扮到靚靚做生招牌，而郭生就落足嘴頭Sell產品。尋日個記者會都唔例外，郭生話化妝品逐漸變成必需品，所以對經濟波動嘅抵禦力較強。
而且莎莎成日引入新產品增加吸引力，就好似南韓Banila Co.有隻化妝品非常暢銷，成日賣斷貨，所以嚟緊莎莎會入成萬件貨，佢仲呼籲大家有買趁手喎。
唔知郭生係咪好開心，講講下仲爆自己都有用呢隻產品，話好好用添！怪不得郭生Keep得咁好啦！
講到阿信屋母公司CEC國際（00759）將會開化妝品店，仲針對低價市場，郭生就話表示歡迎，仲話「有競爭先有進步，有新對手入嚟就證明呢個市場仲有得做，所以我哋莎莎係先鋒，就應該更加有信心做得愈嚟愈好」！
唔驚新對手競爭
佢話估計同阿信屋重疊嘅產品唔會超過15%，而且莎莎產品價格範圍好闊，所以唔擔心會產生價格競爭，亦都唔會因為咁而去改變多年嘅策略。最後佢仲補充，「我哋唔會輕敵，如果有好嘅地方會改善同學習」。