絲絲講場：茅台法國「落戶」部署攻歐

貴州茅台雖然海外市場唔大，但就雄心壯志，要搞大佢，仲喺法國巴黎買定物業，準備發圍，今次就使咗約879萬歐元（約9,133萬港元），物業會作為公司歐洲業務拓展機構。

大陸嘅茅台銷售好勁，依家佢哋嘅市場，已經覆蓋亞洲、歐洲、美洲、非洲南部，去年貴州茅台集團出口茅台酒近1,000噸，創匯1.75億美元，年增長有六成。

聽落好似好多，由於基數大，國際業務佔佢地嘅收入比重好細。以今年上半年計，貴州茅台嘅營業收入中，內地佔97.29%，外國只佔2.71%；利潤分布中，外國市場僅為2.59%。今次亦都唔係佢地第一次走出去，喺今年四月，佢地就用咗2,000萬歐元收購法國羅蒂尼酒莊。