諾貝爾經濟學得主席勒前排鼓勵畢業生應徵金融機構，而唔係去Google呢類嘅科網公司，不過現實係愈嚟愈多著名大學商學院嘅尖子都寧願應徵科網公司，金融機構對新世代嘅號召力大不如前。
哈佛大學商學院今年有18%畢業生加入科網公司，較上年升5%，但加入金融機構就只有27%，仲較上年跌8%。美國其他著名學府耶魯大學、康乃爾大學商學院近兩年都多咗一倍畢業生投身科網界，而麻省理工商學院嘅畢業生投身金融界就由27%跌到16%。
其實好多九十後揀工已經唔再一味睇錢份上，好多尖子反而畀Google、Linkedln呢類科網公司嘅企業文化同使命吸引，覺得有機會畀佢哋去創新，唔使只顧幫公司搵錢，所以佢哋甚至唔介意科網公司嘅人工比金融機構低，史丹福畢業生喺金融機構嘅起薪點中位數15萬美元，另加13萬美元花紅，但科網公司底薪中位數只不過係12萬美元加3.8萬美元花紅。
雖然金融機構人工高啲，但好似投行咁長期On Call嘅工作真係令好多畢業生耍手擰頭，既然用銀彈打動唔到班尖子，投行着手改善工作環境，好似高盛減少初級員工周末工作時間，巴克萊銀行最近就推出星期五便服日，希望可以吸引新血加入。