內地企業近年頻頻用錢彈策略遠攻海外，唔少國際拍賣會都可以見到內地有錢人身影。好似新進《福布斯》中國首富王健林掌舵嘅萬達集團，星期一就喺佳士得紐約拍賣會上，用2,816.5萬美元（約2.2億港元）搶到畢加索嘅代表作《兩個小孩》。唔好睇成交價比估價高咗一倍多，其實佢哋心目中價位係5,000萬美元，今次算係執到平貨！
王健林早排榮登國產富豪榜首，有人計過，淨係喺過去一年，佢嘅財富就增長咗372億（人民幣‧下同），簡單啲講，即係平均每分鐘賺7萬，難怪首富次次出手都係億億聲，早排有人質疑萬達今年積極發展文化產業，過千億投資「錢從何來」，王健林都可以好豪氣咁答：「錢，萬達還有的是」。
萬達嘅藝術品收藏負責人郭慶祥話，今次喺佳士得紐約拍賣會投得畢加索代表作，係萬達收藏世界級藝術家作品嘅第一步，嚟緊仲會繼續收藏唔同風格嘅藝術家作品喎。
據講萬達通過同西方美術史專家嘅研究，確認《兩個小孩》係畢加索創作巔峰期嘅作品，藝術價值高過畢加索早年作品《拿煙斗的男孩》，呢幅畫曾創造1.04億美元（約8.1億港元）嘅繪畫拍賣世界紀錄，至今仍是世界上最昂貴嘅油畫之一。
《兩個小孩》創作於一九五○年，畫中人物形象係佢3歲兒子和一歲女兒，從當年這件作品由完成到畢加索去世後，一直懸掛喺畢加索工作室嘅顯要位置，反映係佢至愛之一。
余絲韻