Market Insight：內房股睇定無壞

內地三中全會召開在即，意外是阿爺無刻意出來在金融市場「維穩」，昨日人民銀行個半星期內第三次逆回購，規模80億元人民幣的七日期逆回購中標息率4.1厘，同十月二十九日嗰次一模一樣。

睇番七日期拆息，從十月底高位5.55厘，輾轉落番嚟昨日的4.23厘，不過，對比十月中旬急升前的3.2至3.5厘，依然高出一截。從逆回購做得「到喉唔到肺」來看，估計阿爺依家憂慮年尾內地通脹再抽上去，多過係怕班A股炒家，埋怨第四季食唔到尾胡。

古勝冇點你2013/11/06

萬里長空

觀望樓市調控政策

世茂房地產（00813）首十個月合約銷售556.07億元人民幣，按年升42%，仲有兩個月，已提早完成高管年初訂下嘅全年550億元人民幣銷售目標，以十月份75.06億元人民幣銷售額來看，比頭九個月月均53.4億元人民幣足足多出四成，十‧一黃金周銷情，果然同傳聞中碧桂園（02007）高管嘅電郵內容一樣，夠晒火爆！

不過，十月中之後，世房股價同唔少內房股一樣牛牛皮皮，同強勁銷售表現背馳。講到底，基金做定風險評估，預備三中全會有針對樓市政策出台，古勝近期留意到唔少大行報告，估計中央最辣會推埋最後房產稅，普遍意見係如果不作全國性執行，集中炒得火熱的一二線城市，稅率又唔太令人驚喜的話（街外估緊0.8至1%），對內房股影響有限。照咁睇，可以留意三中全會後，如果一切塵埃落定，或者內房股仲有條件炒多一浸，以反映九、十月的強勁銷情。

香港資源割愛有因

唔經唔覺，珠寶品牌「金至尊」由已除牌的恒豐金業於○八年落到白武士香港資源（02882）手上，昨日又再以3億元賣掉五成股權畀六福集團（00590），五年多輾轉易手兩次。

好耐無留意香港資源消息，不過客觀環境，內地個人遊帶旺香港金飾業，君可見通街金舖多過銀行。雖然近一年多時間，個人遊消費力減弱咗，香港資源居然可以連蝕兩年最後要變賣家檔，除經營不善，真係無乜其他更好解釋。搵行家代為管理（六福每年顧問費用為6%稅前溢利或者1,000萬元，以較少一個為準）未嘗不是出路。

不過，昨日香港資源股價一度翻一番，股民反應估唔到咁激，本身香港資源無咗五成金至尊收入，加埋六福借埋錢畀佢，批五年期可換股債券行使價居然仲低過停牌前股價（換股價0.18元），大約等於1倍市帳率，同其他金飾股平均2.7倍市帳率比較低一截，樂觀啲睇，六福執到平貨（不過由於盈利基礎大，滙豐證券話即時幫助唔太明顯），但心水清者只看到香港資源在交易中，議價條件確實麻麻，這或許正反映本身的情況，值得股民入市前再諗清諗楚。

內銀新丁期望不大

舊年七月上市的美麗家園（01237）昨午後沽壓湧現，尾市更遭洗倉，由全日高位1.35元質到落全日低位0.72元，收報0.76元，跌幅43.7%，成交3,149萬元，睇落似係斬倉盤所致，實際係咩因由就等公司解話。雖然呢期多咗新股上市，但表現參差，昨日首天掛牌的先鋒醫藥（01345）股價跌穿招股價4.1元，收報3.84元。

內銀股氣氛唔就，係咪對重慶銀行（01963）及徽商銀行（03698）掛牌初期表現有所啟示，前者今日掛牌自有答案。事實上，家陣市場上大型國有銀行估值都咁低，地方性銀行股業務風險始終較高，如無意外要等到明年下半年內地A股及經濟再次騰飛，地方性銀行股的「高增長」特色才會被重視，故認購者若然想有較理想回報，就要有心理準備守一段時間，別對短線表現期望過高。

古勝