美元終於出現久違了嘅反彈，美匯指數落到去79，再急跌嘅機會已經唔大。雖然唔會急跌，不過講轉勢都仲係太早，始終市場焦點都仲係想知道美國聯儲局退唔退市。
不過，睇美元之餘，記得留意埋隻紐元。前個禮拜加拿大央行自一二年四月以嚟，首次透露放棄加息嘅訊息，令到紐元成為咁多隻外幣之中，最明確有加息訊號嘅外幣。
此外，新西蘭加息背後嘅目的，都係想壓抑當地熾熱樓市，今年以來新西蘭樓市升咗至少8%。近幾個月你打開財經報紙，見到最多嘅唔係Sell香港樓盤，而係已經轉推英國、澳紐等地買樓。
新西蘭央行雙管齊下，自十月一日開始當地銀行新批按揭中，最多只可以有10%嘅申請者做九成按揭，目的係增加置業者買樓成本。早前央行副行長Grant Spencer就講過，央行嘅做法目標係確保樓價不斷上升唔會對經濟造成更廣泛影響，但都需要一段時間先見到效果，情況有少少似香港嘅雙辣招。
由於澳洲央行行長剛剛先話現水平澳元匯價可能出現顯著貶值以增加競爭力，紐元仍然係商品貨幣中最好。
紐元短線見0.8220有初步築底機會，不過未確認已完成調整，仍有機會測試0.8100至0.8150，建議吸納紐元，目標先睇0.8390，止蝕於0.8050。
GMO CLICK環球通副總裁 陳健豪