絲絲講場：A貨喬布斯倒戈幫聯想
荷里活型男艾斯頓古查（Ashton Kutcher）主演嘅電影《喬布斯》，今年八月上咗畫，而佢就扮演已故嘅Apple教主喬布斯。現實中，艾斯頓古查最近真係由電影圈踩入科技界，獲聯想聘請，成為新款平板電腦嘅產品工程師。
新板腦瞄準Apple三星
艾斯頓古查同喬布斯外形有幾分相似，最諷刺係聯想嘅平板電腦，係衝住Apple嘅產品而來，佢今次嘅職責，係參與設計，會唔會喬布斯上身，睇通晒大家嘅優劣呢？
聯想最新發表嘅平板電腦「Yoga」，電池續航力延長至18小時，採用Android 4.2系統，又配備有500萬像素嘅攝像頭，係咪搶到Apple、三星嘅市場份額，真係要拭目以待。
艾斯頓古查幫手設計
聯想首席市場營銷官David Roman大讚呢位新任產品工程師，話艾斯頓古查喺開發Yoga平板電腦幫到手，提供好多板腦設計、規格、軟件嘅意見。HTC就曾搵「鐵甲奇俠」羅拔唐尼拍廣告做代言人，聯想今次會唔會順便搵艾斯頓古查做埋代言人呢？
余詩韻