絲絲講場：張樹槐跑到非洲「撲水」

恒生銀行（00011）傳訊及企業可持續發展總監張樹槐（Walter）熱愛馬拉松，最近仲完成撒哈拉沙漠毅行，成功籌得20萬元，為非洲逾千人提供供水設施。佢仲不忘發揮銀行家本色，喺撒哈拉沙漠用恒生網上理財服務，通過恒生e-Banking購買恒生指數基金同恒生H股指數基金，沙漠網上買基金，真係新穎。

佢花名叫「水哥」，幫國際非政府組織WaterAid籌款，得心應手喇，支持佢嘅包括「老細」李慧敏、執董薛關燕萍及馮孝忠、恒地（00012）非執董歐肇基、新地（00016）執董陳國威、公關和廣告公司老闆、多位上市公司嘅傳訊主管，以及資深傳媒工作者。

今次遠赴北非撒哈拉沙漠完成約100公里毅行，係佢繼去年成功挑戰世界第一峰珠穆朗瑪峰馬拉松後嘅新嘗試。當地最高溫度為攝氏51度，為補充體內水分嘅消耗，每名毅行者平均每日要喝上10公升水，另外，身處沙漠，亦得抵受7天不能洗澡。

不過最令佢難忘嘅係晴空萬里、浩瀚黃沙嘅壯觀景致。由於晚上冇光污染，夜空嘅星光特別明亮，仰望繁星，頓感人之渺小。