絲絲講場：印度西施閃照滙豐酒會
雖然滙控（00005）上星期先公布退出印度零售業務，但並唔代表佢哋唔重視印度市場。前日滙豐就為一年一度嘅印度屠妖節舉行酒會，唔止有香港區總裁馮婉眉及香港工商業務主管陳樑才等高層，仲有四百幾位客戶賞面出席，更請嚟一班美艷嘅印度西施助興，場面熱鬧。
當日布置金碧輝煌，金色背景板上排滿七彩吊飾，民族風味濃厚，排場十足，啱晒印度客戶品味。
賓主共歡 賀屠妖節
當晚一向着開純黑套裝嘅銀行高層都入鄉隨俗，又以馮婉眉一件深粉紅色絲質外套最為搶鏡，一洗平日嚴肅嘅形象。
屠妖節又叫排燈節，好似我哋農曆新年或者外國嘅聖誕節咁重要，當地人不論宗教，一齊歡度連續五日嘅佳節。
滙豐為屠妖節搞酒會已經超過十年，同印度客戶打好關係，應該贏得不少印象分。今年屠妖節於十一月三日下星期日開始。
余詩韻