絲絲講場:馬化騰千七萬捧徐悲鴻

由內地商界創立、專幫內地愛滋孤兒、殘疾兒童康復嘅「愛佑慈善基金會」舉行慈善晚宴,雲集內地一線商界名人參與拍賣環節,騰訊主席馬化騰以1,700萬元(人民幣‧下同)全場最高價,投得「中國近代繪畫之父」徐悲鴻嘅珍貴作品,成為全場最矚目嘅買家。

四駒傑作競投激烈

呢幅名畫由萬達集團董事長王健林捐贈,眾所周知王健林嘅嗜好就係收藏名畫,佢拎得出嚟嘅畫作,身價自然有返咁上下。

聽講畀拍賣行專業人士估價,一睇到出自徐悲鴻大師嘅手筆,人哋第一句就會話一匹馬已經值好多錢,兩匹馬估值500萬元,而呢幅畫總共有四匹馬添,所以競投相當激烈,一開始叫賣800萬元,幾輪競價後以1,700萬元高價成交。

馬化騰咁大手筆投呢幅畫,除咗為慈善,唔知係咪趁出年係馬年,想順便討個好意頭呢?之不過,絲絲就覺得,對馬化騰嚟講,1,700萬就可以話濕濕碎,騰訊市值啱啱破八千億港元,佢持有9%股權市值就720億港元啦!

李彥宏投張曉剛作品

至於嗰晚慈善晚宴,百度創辦人李彥宏亦都以390萬元投得中國當代藝術家張曉剛嘅作品,全晚活動就一共籌得5,684萬元,作為「孩子們的快樂成長」嘅慈善用途。

余詩韻