絲絲講場:老虎收徒要誠實醒目

殿堂級對沖基金經理、老虎基金創辦人羅拔遜(Julian Robertson)早已金盆洗手,但一言一行依然好有影響力。佢最近接受金融招聘網OneWire訪問,畀業界一啲揀蟀貼士,對於自己嘅徒弟,緊係有讚冇彈啦,佢自言老懷安慰,自己愛錫嘅一班徒弟能夠做出咁好成績,好令佢自豪!

羅拔遜曾掌千七億

羅拔遜仲教路,對沖基金經理最重要嘅特質係醒目同埋誠實,緊隨其後先至係競爭力,「嗰啲到依家未輸過嘅人,將來都唔會衰」!

羅拔遜當年揸弗嘅Tiger Management,可謂全世界首屈一指嘅對沖基金,更加同國際投資者索羅斯嘅量子基金齊名,喺頂峰時期所管理嘅資產高達220億美元(約1,716億港元)!

最經典嘅莫過於九七年夥拍一眾行家攻擊香港嘅聯匯制度,搞到特區政府用成千億去對付,後來老虎基金因投資日圓同全美航空失誤勁蝕,被迫喺○○年解散。

羅拔遜隨後就由佢手下嘅老虎仔延續傳奇,佢嘅門生Philippe Laffont同Lee Ainslie分別主理Coatue Management同Maverick Capital,現時為最成功對沖基金之一。

余詩韻