飛勻中港台打理業務
唔講唔知，何達德曾經喺好多地方工作過，足迹遍布澳洲、印尼、泰國、台灣、香港，實行走遍亞洲大地，食勻各地美食！咁多種美食當中，何達德就話最鍾意Spicy food，所以印尼菜及泰國菜就啱晒佢胃口。
最近何達德有個新任務，就係統領兩岸三地嘅保險及財富管理業務。短短幾星期，佢已經中港台四圍飛，並正式踏足宏利喺內地五十個據點城市。
中國人對食最講究，菜系特別多，較為人熟悉嘅有京菜、粵菜、川菜、湘菜、蘇菜等，絲絲以為外國人都比較鍾意食粵菜嘅一盅兩件，不過，何達德就話最愛食川菜，貪佢夠辣夠滋味！絲絲即刻諗起辣到飛起嘅重慶雞煲，如果何達德去開重慶巡視業務，不妨試吓！