各位職場女性搏殺之餘，都想搵番個榜樣學習吓。最近美國《財富》雜誌公布一三年「商界50位最有影響力嘅女性」排名榜，幾乎每位都喺公司甚至業界舉足輕重。
今年榜首係蟬聯嘅IBM主席兼行政總裁Ginni Rometty，佢坐上CEO個位第二年，致力將資源投資喺超級電腦Waston，睇好佢帶嚟新商機。另外，佢仲積極進軍非洲等被忽略嘅市場添。
Facebook營運總監桑德伯格（Sheryl Sandberg）就排第五，Facebook現時有四成收入都係來自手機遊戲，原來呢個方向就係由桑德伯格領航。早前佢仲出版著作《向前一步》（Lean In）探討兩性喺工作上地位不平等嘅現象，喺全球大賣。
至於Yahoo嘅CEO邁耶當然榜上有名，佢由舊年嘅十四位躍升至今年第八位，更係50位上榜女性中最「後生」一位，今年只係38歲咋。過去一年邁耶帶領Yahoo改革，有唔少令外界出乎意料嘅收購，仲親自為公司設計新Logo！
講開又講，「商界50位最有影響力嘅女性」排名榜中，似乎清一色外國女性，連一張亞洲女性嘅面孔都冇。大家唔使失望，即時升呢去「全球商界50位最有影響力嘅女性」排名榜睇一睇，一張張絲絲熟悉嘅面孔即時出現，好似摩根大通亞太區副主席李晶重新入榜，排名四十位、中國女股神及西京投資主席劉央，排名四十五位。
至於SOHO中國（00410）首席執行官張欣雖然排第五十位，係排最尾，但話晒係全球最有影響力女性第五十位，都唔嘢少囉！何況佢亦係今年重新殺入個榜添！至於成個榜裏頭，就一共有七位中國嘅商界女強人入榜。
余詩韻