絲絲講場：六國酒店80大壽齊懷舊
香港最老嘅兩間酒店係半島同六國，分別85歲同80歲。六國尋日開Party慶祝八十大壽，唔少長情住客都嚟飲番杯，酒店總經理李國儀滿場飛，佢話當年租房兩蚊雞，靚房都係十幾蚊。當然，當年打工仔嘅月薪只係兩、三蚊，所以住得起六國真係非富則貴！
今次佢哋仲展出酒店珍藏嘅六十年代古董人力車，同埋由廿幾張六國酒店舊相片砌成嘅相片廊，包括三十年代酒店開業時，聳立於灣仔海旁嘅相片、靈感嚟自六國飯店嘅荷里活電影《蘇絲黃的世界》嘅五十年代報章剪報。
當年開業創三紀錄
早喺一九三一年陸海通創辦人陳任國同陳符祥，以逾20萬買入六國酒店現址，酒店喺三三年十月六日開幕，仲拎到三個第一。酒店樓高七層，唔止係當年港島區最高建築物，亦係第一間設有中菜廳嘅酒店，兼且係灣仔區首幢有升降機嘅建築物！
屹立八十年，六國酒店經歷過好多風雨，所以海陸通主席陳伯奇喺大會就話，多謝客人一路以嚟嘅支持。李國儀都話，酒店有八、九成係熟客，最長情嘅已住咗廿幾年添！
余詩韻