自從內地新一屆政府掀起打貪之風，作為全球最大奢侈品消費市場嘅中國，一眾國際奢侈品牌當然大受打擊啦。好似意大利超級跑車品牌林寶堅尼（Lamborghini）咁，中國喺短短三年時間就躍升為佢哋嘅第二大市場，食粥食飯真係靠晒一班內地富豪。不過林寶堅尼嘅母公司德國福士車廠今年就已經打定輸數，因為打貪影響，已經預計今年內地嘅銷量會明顯下滑，依家就惟有發掘「下一個中國」。
林寶堅尼行政總裁溫德爾曼（Stephan Winkelmann）話，舊年內地就賣出230架跑車，估計今年會跌到200架左右。但佢都尚算心水清嘅，照依家嘅政策，要氹內地客買跑車呢啲奢侈品實在有啲困難，所以林寶堅尼會將目光放喺印度身上，睇好印度嘅長遠潛力，同埋寄望美國嘅銷量理想，可以拉上補下補番銷量跌緊嘅內地市場。不過，溫德爾曼仲好留戀內地市場，佢話最不幸嘅係再冇幾多個好似內地咁嘅市場。計絲絲話，又要多富豪，又要多富豪鍾意買架跑車飛吓車、炫吓富，咁就當然有難度啦。