絲絲講場：恒生陪「老友」慶中秋

今日中秋節，絲絲祝大家人月兩團圓，原來恒生（00011）管理層同埋義工喺上個星期六，已經同一班老人家提早做節，執行董事馮孝忠（Andrew）、零售銀行及財富管理業務主管陳力生（Nixon）同埋分行網絡業務主管譚麗琼（Peggy）等，仲同160個「老友記」食中秋飯做節，大玩「收買佬」遊戲。

絲絲每一年都覺得中秋唔少得賞燈會，超過50個恒生義工就同老人家一齊，親手設計同紮咗200個懷舊花燈，一班長者亦好互動，為Andrew同Nixon等義工表演扇舞，話答謝恒生嘅善心。

話說今年中秋恒生管理層都飲得杯落啦，因為啱啱畀《亞洲銀行家》選咗做亞太區資產負債表最勁嘅銀行，計分標準包括放貸能力同信譽等等，仲犀利過阿媽滙豐銀行，滙豐資產負債表嘅表現只係排第4，不過金融海嘯一役早就顯示到恒生穩陣啲嘅形象啦，排名第一呢啲嘢，錦上添花。

余詩韻