Market Insight：地產股被過分低估

昨日港股靜到暈，等聯儲局議息，基金大條道理翹埋對手，實行唔做唔錯，恒指跌63點報23,117點，主板成交縮到501億元，是接近三個半星期最奀，入股搜狗後騰訊（00700）未好過，昨日再跌3.9%報402.4元，一隻股票拖低恒指57點。

究竟開大開細，執筆時仲未知，退後幾步睇，現時港股只差1.6%就去番五月高位23,512點，相比下，國指的確比較弱，昨日收報10,588點，差6.8%先返回五月高位，如果唔係一堆重磅內銀股，早前因為發優先股集資獲開綠燈，可能仲更加落後。

古勝冇點你

萬里長空

沽樓轉炒股誘因低

賓架界傳九月內地經濟數據，好可能及唔上七、八月咁好，一來re-stocking旺季過咗，亦有傳聞話九月上旬發電量增幅，會比七、八月同期明顯放緩，消息堅定流？到十月自會水落石出，歸根究柢，今浪港股因為內地經濟數據反彈，由六月低位炒上嚟，咁嘅傳聞揮之不去，唔多唔少都影響氣氛。

關於樓市，今日再講一下，話說近排好多有頭有面之士，話雙辣招會令港樓價兩年要跌五成，誇大成分多於一切。一來古勝深信美國經濟條件及官民負債過高的問題，缺乏大幅加息條件，如果中國經濟不至於陷入極惡劣的硬着陸環境，要港樓大跌唔易，地產商及代理行依然發出淡過白開水的預警，說穿了抱住試試無妨心態，博政府在雙辣立場上軟化，唔好阻佢地搵食。

古勝身邊喜歡買磚頭收租的朋友唔少，問佢哋辣招下會唔會加碼，十居其九耍手擰頭，相反問佢係咪睇淡到要賣樓套現，一樣予以否定，主要考慮係雙倍印花稅，對買樓收租的打擊唔細，672萬元以上物業經已畀7.5%印花稅，以目前租金回報約3厘左右計，閒閒地租兩年至夠冚印花稅；再者，○九年之後港股不過係大型上落市，恒指在16,000至25,000點之間浮沉，阿爺話經濟「保底」就升，阿爺話調控就跌，完全係「政府行為」，沽樓套現炒股誘因更低。

辣招是樓市買賣膠着的元兇，最慘係無資格入住公屋或者買居屋，私樓又負擔不到的夾心人，等樓價跌真係三年又三年。試想就算樓價以兩年一成速度下跌，同期就算畀你等到，一句講晒，慳到條數不過變咗租金，交畀另一個業主，故在下十分認同未有第一間自置物業的實質是short緊樓市，有一間自主也只算market netural，揸多過一間以上先稱得上long緊貨的講法。

長實恒地視為首選

早兩日超人話長和系唔會遷冊及撤資，長實（00001）立即發威升3.1%去到120元超過半年高位，既然地產股目前對比歷史估值處中下限水平，有乜風吹草動，向上機會應大於向下。目前恒生地產股指數市帳率0.84倍，但仲比九七年至今平均1.18倍，低出29%。

回顧市帳率低去到0.8倍水平，期間得幾段時間，包括九七、九八金融風暴、○二至○三年的後科網泡沫及沙士期間、○八年初美國次按風暴，以及一二年至今，若今浪樓價無出現上述時間波動，那地產股就有過分被低估之嫌，心水係長實、恒地（00012），新地（00016）在積極增加經常性收入之下，先放在第三選擇。

中資周期股要抖氣

指數缺乏方向，炒家冇嘢好炒，除咗用低息認購新股博一博之外，仲積極發掘股仔炒作，好似呢兩日連細價濠江股都炒得甩轆。若然末季A股持續回升的假設正確，相信中資周期性股份在本月下旬抖夠氣，會在十月初長假後又再次發力，若十月內地公布的第三季經濟數據持續改善，將為周期性股份提供動力來源。故趁呢期淡靜市，不妨（目及）實煤炭、建材、基建及鐵路股在低位的承接力，以作出部署，咁比起高追升得無厘頭的股仔實際得多。

古勝