絲絲講場：花旗晚宴財星敍舊
素有「銀行界少林寺」美譽嘅花旗香港，早前搞咗個星光熠熠嘅「舊生及銀禧職員晚宴」，唔少銀行、政界猛人係座上客。花旗當晚向每位賓客送上一個有200年歷史嘅紙鎮，點解係200年？因為裏面有張一八一三年City Bank of New York發行嘅兩蚊美金紙幣o架！
花旗集團盛產翹楚，本港唔少財金界、公共事業猛人都出自花旗，搞晚宴一定好盛大。
絲絲聽講，當晚有好多花旗集團嘅前管理層，以及喺集團工作逾25年嘅現職及前任同事盛裝出席，數落都有成260人，一邊歎美酒佳餚，一邊睇舊相、舊廣告片段，回味舊時美好時光。
梁錦松陳子政資歷深
聚首一堂當然係難得，更難得嘅係好多猛人都抽時間蒲頭，有「紅籌之父」之稱嘅梁伯韜就係其中一個座上客，○六年離開花旗之時，佢已經係花旗集團投資銀行亞太區主席喇！
兩位花旗集團香港區前行長梁錦松、陳子政就孖住出席，唔講唔知，佢哋喺花旗集團分別做咗23年同27年o架！不過，講到晚宴中年資最耐嘅，原來係一個喺分行工作嘅男員工，佢喺花旗做咗三十幾年o架！
聽講花旗都有邀請王冬勝，不過絲絲睇相又唔見佢嘅影蹤，話晒佢喺兩間英資大行（渣打及滙豐銀行）出任要職之前，都係喺萬國寶通銀行（花旗前稱）出身o架，睇怕王冬勝梗係太忙，所以行唔開啦！
余詩韻