招商銀行（03968）前行長、永隆銀行董事長馬蔚華，近日喺達沃斯論壇嘅講話題材真係好醒神，繼日前評論內地如果實行利率市場化，將令內銀盈利大打折扣之後，尋日仲幫「走出去」嘅內企占卜，話失敗機會大，失敗率係全球第一。講得咁坦白，已經「走出去」嘅內企，會唔會腳震？
佢講呢個題材，似乎有晒數據backup，佢話中國企業「走出去」現時失敗率比較高，一○年失敗率更加係全球第一，超過10%，收購效益亦較低，超過20%虧損，現時中國企業跨國經營指數只達14%，遠低於美國嘅逾40%。
中國企業嘅問題其實大家心裏有數，不過做內銀老總時梗係要派定心丸同將前景講得好聽啲，馬蔚華放低內銀名銜之後，的確講得到肉好多，絲絲認為，如果其他內銀老總退落嚟之後都可以咁放膽講嘢，中國商業市場個糾正機制一定可以發揮得更有效。
余詩韻