港交所（00388）行政總裁李小加近排畀阿里巴巴上市單嘢搞到頭都痕，不停要穿梭上市科、上市委員會同證監會之間密斟，好彩最近港交所上市科首次公開招股交易部門（IPO team）喺投行撬左兩名猛將加盟，出任上市科總監。唔知有冇「絕世好橋」可令阿里上市單嘢重現生機呢？
絲絲聽聞，兩位上市科「新星」，一個係嚟自美資投行嘅律師，八月尾加盟。另一個就嚟自歐資投行嘅研究部，九月初加入。
雖然阿里上市單嘢全城矚目，上市科IPO team為咗呢單世紀大deal疲於奔命，但其實上市科內部仲有大把工作要做，事關十月一日起保薦人新規定就會出台，要求保薦人做足「工夫」至好提交上市申請嘅同時，上市科自己都要提高效率，加快審批，縮短上市嘅流程，故需要增加人手應付。
不過有中環友就擔心，上市科近年請咗唔少嚟自投行嘅精英，對佢哋係咪咁適合做監管工作，有啲保留。
另一邊廂，港交所旗下倫敦金屬交易所（LME）嘅新CEO雖然已拍板，但傳聞可能續有人事變動。早前盛傳有份角逐CEO嘅現任副行政總裁Diarmuid O'Hegarty（歐德銘）已「劈炮」提出請辭之外，市傳有人會跟住走。不過，絲絲覺得外間對佢哋人事不停「車輪轉」都見怪不怪喇！
余詩韻