絲絲講場:溫州大款落難13億剩30蚊

相信大家對「溫州炒樓團」印象仲好深刻,事關班溫州人個個都好豪氣,仲話「溫州人買樓如買白菜」添呀!不過,事隔幾年,令到佢哋賺大錢嘅民間高利貸已經爆煲,搞到當地經濟變差,仲有好多企業老闆還唔到錢。

據說近日浙江有位企業老闆,炒燶樓欠下巨債。原來佢早喺五月已經被公安拉咗,仲被起訴「涉嫌非法吸收公共存款」,金額有成13億元(人民幣‧下同)。但最諷刺嘅係,公安拉佢嗰時,佢身上淨番30蚊咋!

借貴利炒樓終爆煲

絲絲收到風,佢同其他溫州老闆一樣,都係靠借民間「大耳窿」嚟炒樓,由於早幾年炒樓手風都幾順,結果愈炒愈大!

不過,最近一年因為溫州嘅資金鏈斷裂,搞到佢「周身蟻」,所以累計高達13億元嘅債務!

絲絲聽講,13億元債務入面有成6.3億係嚟自民間嘅高息借貸,而且仲有成73人借咗錢畀佢呀!

不過弊就弊在,呢73個借「大耳窿」畀佢嘅人,可能都係問人借「大耳窿」o架,涉及嘅人多到數唔晒呀!絲絲希望溫州人可以吸取教訓,唔好再「放貴利」啦,事關用錢搵錢雖然係利潤高,但真係好危險o架!

余詩韻