絲絲講場：巴拉過檔小米有內情
估值達百億美元嘅小米科技，主打產品小米手機喺大陸熱賣，公司創辦人之一嘅林斌尋日突然喺微博上宣布，掌管全球Android產品業務嘅Google副總裁巴拉（Hugo Barra）會喺下個月初加入小米做副總裁，專責國際業務。呢個消息喺手機界雖然震撼，但絲絲聽埋佢啲花邊新聞覺得仲震撼呢。
離Google疑因老闆奪愛
有人形容係一次挖角，亦有人認為係代表咗小米同Google嘅戰略合作，為小米國際化鋪路。不過亦有傳可能係巴拉同前女友關係轉變嘅副作用。美國有科網Blogger爆料，話Google創辦人布林同太太安妮（Anne Wojcicki）已經分居咗幾個月，好有可能係因為多咗個第三者，呢位第三者竟然係巴拉嘅前女友，你話呢個消息幾爆呀！雖然又有消息話，巴拉離職同呢段「四角戀」無關。
益咗小米自家製系統
之不過，小米手機一向用開Android平台，更跟住Android嚟開發咗一套自己嘅操作系統MIUI，而巴拉做過Android嘅產品總監，「轉會」後會唔會洩露Android嘅秘密畀小米，就不得而知啦。
小米近來亦都搞作多多，繼舊年出咗小米2手機之後，下月再出小米3手機，傳聞仲會公布推出一部7吋板腦，同蘋果一樣採用Retina屏幕同埋四核CPU，賣價只係1,299元人民幣，擺明衝住iPad Mini而來，喺內地手機市場已經超越蘋果嘅小米，有埋Google猛人加盟仲唔係如虎添翼！
余詩韻