上海設立自由貿易區嘅消息繼續發酵，持有「自貿區概念股」嘅股民就認真發達，著名作家余秋雨就因為揸咗好多徐家匯商城嘅股份，身家亦都升咗唔少，畀投資者喻為A股市場中「最有錢」嘅作家。
早喺二○○一年，余秋雨以每股唔夠三蚊嘅價錢，購入徐家匯商城82.5萬股，出資241萬元（人民幣‧下同），經過數年嘅股本增資，佢嘅徐家匯持股數量已達518萬股。
最新年報睇到，佢一股都冇賣過，依然持有518萬股，以尋日嘅收市價10.44元計算，余秋雨淨係揸住呢隻股票，身家已超過5,400萬元，計番個成本增值咗20倍有多。
雖然係賺咗好多，其實徐家匯股價曾經去過20元，即係話，余秋雨淨係揸住呢隻股票，身家都曾經過億元，難怪被喻為A股市場中「最有錢」的作家。