光大証券最近真係好黑仔，連續兩日落錯盤，第一日傳股數變手數，3,000萬股變咗3,000萬手，第二日就落錯國債價，好彩講掂數，冇金錢損失，但商譽損失就好難計喇。絲絲喺招聘網站，見到唔少嚟自光証嘅招聘廣告，近日出現嘅事故，莫非同人手唔夠有關？網友仲好幽默咁幫廣告加多句「光大需要你」。
呢啲招聘廣告涉及幾個唔同部門嘅工種，貼出日期都係七月、八月，當中包括交易部門、高頻交易同埋環球市場部門，睇嚟佢哋真係好等人用喎！
絲絲覺得光証咁大間公司，請人應該無難度，人事部都係快手啲請多幾個人，避免公司再擺烏龍喇。
講開又講，今年係光大集團成立三十周年，佢哋早已經定咗，九月九日喺香港舉行慶祝酒會，董事長唐雙寧同副董事長臧秋濤親身來港，到時唔止場面熱鬧，話題都一樣熱鬧。