絲絲講場：龍湖廿周年員工分「熊」
老細送畀你嘅嘢，除咗錢之外，仲有乜野係唔會隨手丟咗去？絲絲點都諗唔到，竟然係一隻啤啤熊囉。龍湖地產（00960）呢個月踏入創辦二十周年嘅好日子，公司就送咗隻啤啤熊畀每位員工，夠晒特別。
派特別股息勢落空
原來公司好認真咁研究咗一段時間，有咩禮物啲員工唔會隨手丟咗去，所以就揀咗印有龍湖英文嘅公仔送畀大家，之但係點解個公仔會揀熊仔，而唔係比較「老黎」嘅牛仔，就不得而知了。
咁股東呢？好多人期望啲周年慶典，都會派特別股息喎，不過董事長吳亞軍就話，唔會因為咩特別紀念日，將派息政策搞亂哂，嚟緊嘅派息政策都係會遵從派核心盈利20%嘅策略。
做過記者、一向好文采嘅吳總，前個月先就創業20周年寫咗封信講吓感受，今日再有人問起佢呢廿年嚟嘅感想，佢就用「無怨無悔，興趣盎然」嚟概括。
佢又話，喺呢段期間，除咗認識咗好多朋友之外，同員工間又有深厚嘅關係，獲益良多。
余詩韻