近期中港兩地股市，氣氛確實好番唔少。睇番月初至今，內地公布多個經濟數據，包括七月官方製造業PMI，進出口、工業生產，以至七月新增貸款，統統比分析員估計理想，加埋李克強總理保增長的承諾，中國經濟在第二季尾，第三季初見底回升的預期突然成為股市共識，結果五窮六絕七翻身之後，八月股市一樣唔失禮。
曾有人話中國好香港好，查實中國好又點止香港好，近年中國不斷向澳洲採購煤炭及鐵礦石，同澳洲貿易關係密切，今年五、六月中國嚴打「假出口」，貿易數據一出通街眼鏡碎片，A股乜鐵底、鑽石底和建國底都穿晒不在話下，一向有「升」有「息」的澳元，亦跌得極誇張，加埋澳洲央行學足日本，打開口牌話澳元貶值有利改善出口，幫助經濟轉型，一個唔該，澳元兌美元由1.0582，直插去到早兩星期的0.8848先企得住腳，四個月貶值16.4%之多，捧場客收息蝕價，喊得一句句。
匯商估澳元今個周期，至多仲有一次減息機會，若中國經濟開始企穩陣腳，對天然資源渴求逐漸恢復，澳元需唔需要減多次息見仁見智。
最近美國商品期貨委員會報告顯示，澳元淨空倉數字，創下廿年來最高紀錄。股神話人人貪婪，要學會警惕，通街都對袋鼠貨幣敬而遠之，中國經濟轉勢又路人皆見，兩試0.9樓下的澳元，要短期彈番1算或者勉強，不過追番一半跌幅都講緊0.97樓上，邢理強認為對厭倦股海浮沉，想穩陣收息兼賺價的投資者，確實值得諗諗。
INVEST邢理強